VAHAOLANA POLITIKA FOLO (10) ATOLOTRY NY ANTOKO POLITIKA MADIO
62 taona izay no nahazoan’i Madagasikara ny fahaleovantena izay noheverina fa hialana amin’ny ziogan’ny mpanjanaka. Toa fahaleovantena sarintsariny fotsiny ihany anefa izany. 62 taona aty aoriana dia mbola anisan’ireo firenena mahantra indrindra maneran-tany isika. Tao anatin’izay fe-potoana izay anefa dia tsy nisy firenena avy any ivelany nanafika antsika, na koa ady an-trano lehibe ka niteraka fifamonoan’ny samy mpiray tanindrazana.
Ireto manaraka ireto ary ny vahaolana politika atolotray.
Mety ho tsindry avy any amin’ireo firenena hafa izay mangeja antsika ny tsy nirosoana tamin’ireto kanefa heverinay fa antoka hahatanteraka ny vinan’ny Antoko Politika Madio :
« Madagasikara afaka amin’ny zioga mangeja, Malagasy miadam-pinaritra ».
1. RAFI-PANJAKANA
Rafi-panjakana mahasahy mandrava ka mametraka fototra vaovao dia ny lalàm-panorenana tena mety ho an’i Madagasikara : ireo vahaolana manaraka ireo ny fanovana tianay ho entina ao anatiny.
Tanterahina faran’izay haingana izay fifidianana lalàm-panorenana izay.
2. Fanovana RAFITRA
Fanovana RAFITRA sy fisafidianana OLONA : tsy ampy raha rafitra fotsiny no ovaina fa mila olona TENA VANONA sy VONONA. Mila mahasahy manapaka tadim-poitra amin’ny endrika fanjanahan-tany, tsy voageja na voafatotry ny firenena matanjaka. Mila miala haingana ao anatin’ny fahantrana isika noho izany satria ny firenena mahantra dia mangataka lava ka toy ny tsy manana
ny fiandrianany.
3. Olona matihanina amin'ny politika
Olona matihanina amin’ny politika, voavolavola sy voataiza tany anaty Antoko Politika, ary koa ampy fahalalana sy fahaizana no mitondra firenena. Fanampin’izay dia olona manam-pahendrena, tia tanindrazana, manome vahana hatrany ny Malagasy ary tsy matahotra ny hiady sy hiaro ho an’ny
tombotsoan’i Madagasikara.
4. FITSINJARAM-PAHEFANA TENA IZY
– FITANTANANA MANAKAIKY VAHOAKA no rafitra hamaha olana haingana amin’ny fitsinjaram-pahefana eto Madagasikara : FOKONTANY, KAOMININA, DISTRIKA.
Fidiana avokoa ireo tompon’andraikitra ireo ary fidiana ihany koa ireo mpanolo-tsaina ao anatiny. Asesy avy any amin’ny fototra ny fifidianana : FOKONTANY, KAOMININA, DISTRIKA, ANTENIMIERAM-PIRENENA, FILOHAM-PIRENENA. Ahena ny
andraikitry ny filoham-pirenena fa mavesatra loatra
– Foanana tanteraka ny rafitra fanapariaham-pahefana (déconcentration). Miasa eny anivon’ireo vondrom-bahoaka itsinjaram-pahefana (kaominina sy distrika) ireo teknisianina
(administrateurs civils) mahafehy ny fitantanana ny raharaham-panjakana
– Vesatra eo amin’ny asam-panjakana (lourdeur administrative) : tsy maintsy miezaka ny sehatra rehetra amin’ny fanamaivanana sy fanafainganana ny fomba fiasa
5. FISARAHAN’NY FAHEFANA TELO
Tsy mahazo manendry mpikambana ao amin’ny Fitsarana avo momba ny lalàm-panorenana (HCC) ny Filoham-pirenena
– Esorina tsy ho mpikambana ao amin’ny Filan-kevitra ambonin’ny Mpitsara (CSM) ny Filoham-pirenena, mba hitandrovana ny fahaleovantenan’ny Fitsarana
– Fidiana ny Minisitry ny Fitsarana ka ny fianakaviam-ben’ny mpitsara no mifidy azy
– Tsy miandry « décret d’application » ny fampiharana ny lalàna izay efa lany avy any amin’ny Antenimieram-pirenena
6. LALANA MIFEHY NY ANTOKO POLITIKA
– Faritana mazava ny loharanom-bolan’ny Antoko Politika
– Nanolotra volavolam-panavaozana ny lalàna mifehy ny fifidianana ny Antoko Politika Madio – APM, fa ireto teboka roa ireto no tena singaninay manokana :
FERANA ny vola ampiasain’ireo kandidà mba hampitovy lenta ireo mirotsaka ho fidiana rehetra. Azo tanterahina tsara io rehefa mazava ny loharanom-bolan’ny Antoko Politika.
Izany no atao dia mba ny hevitra no hanjaka fa tsy ny vola
TSY MAHAZO MIROTSAKA ho fidiana izay mizaka ny zom-pirenena hafa ankoatry ny Malagasy (double nationalité), fa mora voafatotra izy ireny amin’ny fanapahan-kevitra rehefa misy tombontsoa mifanipaka ny firenena roa tonta.
7. Ny rafitra mpanao lalàna
- Tsy ilaina ny rafitra mpanao lalàna anankiroa (Antenimieran-doholona sy Antenimieram-pirenena)
- Foanana ny Antenimieran-doholona (SENAT) fa ampitomboina ny isan’ny solombavambahoaka, mba hisy lafin-kery sy lafin-kevitra maro samihafa eo anivon’ny antenimieram-pirenena. Farafahakeliny solombavambahoaka IRAY (1) ho an’ny olona IRAY HETSY (100.000). Raha ho an’ny Malagasy 26 tapitrisa izany dia solombavam-bahoaka 260 no ho fidiana.
8. Foanana ireo andraikitra mifanitsaka rehetra (doublure) fa tena mandany vola fotsiny
– Foanana ny CENI : averina amin’ny ministeran’ny atitany ny fikarakarana ny fifidianana hatramin’ny voalohany ka hatramin’ny farany
– Foanana fa tsy nahomby ireo rafitra rehetra miady amin’ny kolikoly izany hoe ny SAC (système anti-corruption) napetraka teto Madagasikara : BIANCO, PAC, SAMIFIN, CSI. Fitsarana ambaratonga voalohany avokoa no misahana ny raharaham-pitsarana rehetra
– Foanana ny « Haute Cour de Justice » HCJ fa manome vahana ny tsy maty manota ary tsy mahaleo tena fa miankina amin’ny antenimieram-pirenena
– Foanana ny Komitin’ny Fampihavanana Malagasy (CFM) fa tsy nahitana vokatra raha resaka fampihavanam-pirenena
– Foanana ny PRIMATURE ka afindra any amin’ny toerana hafa ireo mpiasa rehetra ao. Tsy ilaina ny Praiminisitra fa filan-kevitry ny minisitra tarihin’ny Filoham-pirenena dia ampy
– Foanana ihany koa ireo rantsa-mangaika mifanitsaka andraikitra (organismes rattachés) toy ny : ATT, APMF, BNGRC sy ny maro tsy ho voatanisa…. Efa rafitra anaty ministera no miandraikitra mivantana ny asan’ireo
9. FITSITSIANA
– Tsy ekena intsony ireo fandaniam-bolam-panjakana mihoa-pampana, tsy mifanaraka amin’ny filan’ny ministera sy ireo andrim-panjakana. Ohatra : chèque carburant, fivezivezena sy fivoahana any ivelany, fandehanana jet privé….
– Amidy daholo ireo fitaovam-panjakana mandany vola amin’ny tsy tokony ho izy. Ohatra :fiara 4×4 lafo vidy sy ny maro hafa
– Ny fitaovana rehetra ampiasain’ny olom-panjakana dia vidiana eto an-toerana avokoa raha mbola misy eto
10. FIFANARAHANA amin'ny mpampiasa vola
– Atao mangarahara sy manara-dalàna avokoa ny sehatra hampavitrika ireo mpampiasa vola avy any ivelany handraharaha eto Madagasikara : IDE na Investissements Directs Etrangers
– Ampahafantarina azy ireo mazava tsara ny fifanarahana fa « NY MALAGASY ALOHA » no laharam-pahamehana na dia eo aza ny tombotsoa ho azony amin’ny fampiasam-bola hataony eto
HIFANDRAY – APETRAHO NY HAFATRA